ភ្នំពេញ៖ រដ្ឋសភាកម្ពុជាបានផ្ញើលិខិតអបអរសាទរចំពោះចិនដែលនឹងប្រារព្ធមហាសន្និបាតតំណាងទូទាំងប្រទេសលើកទី២០ នៅថ្ងៃទី១៦ ខែតុលា ឆ្នាំ២០២២ ខាងមុខនេះ ដែលរៀបចំឡើងដោយគណបក្សកុម្មុយនីស្តចិន។

រដ្ឋសភាកម្ពុជាបានវាយតម្លៃខ្ពស់ថា ការរៀបចំមហាសន្និបាតគណបក្សកុម្មុយនីស្តចិនលើកទី២០នេះ ពិតជាមានសារសំខាន់ដ៏ធំធេងសម្រាប់ប្រជាជន និងគណបក្សកុម្មុយនីស្តចិន ស្របពេលដែលចិនបាន និងកំពុងអភិវឌ្ឍសេដ្ឋកិច្ចសង្គមប្រកបដោយវិបុលភាព កិត្យានុភាព និងការកសាងសង្គមនិយម តាមចរិតលក្ខណៈពិសេសរបស់ប្រទេសចិន។

រដ្ឋសភាកម្ពុជាមានជំនឿទុកចិត្តថា៖ «មហាសន្និបាតនាឱកាសនេះនឹងដាក់ចេញនូវយុទ្ធសាស្រ្តស៊ីជម្រៅ និងទិសដៅថ្មីៗប្រកបដោយឆន្ទៈមោះមុត និងការប្តេជ្ញាចិត្តខ្ពស់បន្ថែមទៀត ដើម្បីបន្ថែមល្បឿនក្នុងការពង្រឹងការអភិវឌ្ឍ និងការជំរុញធ្វើយ៉ាងណាឲ្យប្រទេស និងប្រជាជនចិនឈានឆ្ពោះទៅរកភាពកាន់តែសម្បូររុងរឿងបន្ថែមទៀត»។

រដ្ឋសភាកម្ពុជាកោតសរសើរចំពោះសមិទ្ធផលជាតិ ដ៏មហាសាលលើគ្រប់វិស័យដែលថ្នាក់ដឹកនាំ និងប្រជាជនចិនសម្រេចបានក្នុងរយៈពេលកន្លងមកនេះ ក្រោមការដឹកនាំដ៏ត្រឹមត្រូវ និងឈ្លាសវៃរបស់បក្សកុម្មុយនីស្តចិន។ ជាពិសេសបានធ្វើឲ្យប្រទេសចិន ក្លាយជាមហាអំណាច សេដ្ឋកិច្ចទី២ ក្នុងពិភពលោក និងបាននាំឲ្យប្រជាជនចិនចាកផុតពីភាពក្រីក្រចាប់តាំងពីឆ្នាំ២០០២ កន្លងមក។

លើសពីនេះការអភិវឌ្ឍ និងតួនាទីស្នូលដ៏មានសារៈសំខាន់មិនអាចខ្វះបានរបស់ចិន បាននាំមកនូវសន្តិភាព ស្ថិរភាព វិបុលភាព វឌ្ឍនភាព និងការអភិវឌ្ឍទាំងក្នុងតំបន់ ក៏ដូចជាសកលលោកផងដែរ។

រដ្ឋសភាកម្ពុជា ព្រមទាំងប្រជាជនកម្ពុជា ជូនពរឲ្យមហាសន្និបាតប្រព្រឹត្តទៅប្រកបដោយជោគជ័យ និងទទួលបានលទ្ធផលជាផ្លែផ្កា ដើម្បីសាធារណរដ្ឋប្រជាមានិតចិន សម្រេចបាននូវ ជោគជ័យដ៏ធំធេង និងថ្មីៗថែមទៀត។ ជាពិសេសការសម្រេចបាននូវគោលដៅ ក្នុងការកសាងប្រទេសសង្គមនិយម ដ៏ទំនើប រុងរឿងខ្លាំងក្លា ប្រជាធិបតេយ្យ វប្បធម៌រុងរឿងជឿនលឿន និងសុខដុមរមនានៅឆ្នាំ២០៤៩។

រដ្ឋសភា រួមទាំងប្រជាជនកម្ពុជា នឹងនៅតែបន្តគាំទ្រនូវគោលនយោបាយចិនតែមួយ និងបេ្តជ្ញាបន្តការជួយគ្នាទៅវិញទៅមកក្នុងភាពជាដៃគូល្អ ជាមិត្តដ៏ល្អ នៅគ្រប់កាលៈទេសៈនៃការលំបាក ចំពោះបញ្ហាប្រឈមទាំងឡាយ នៃការបម្រែបម្រួលអាកាសធាតុ និងការផ្លាស់ប្តូរយ៉ាងឆាប់រហ័សនៃសភាពការណ៍នយោបាយក្នុងពិភពលោក៕